Çıra Biyime Meyman?

Omıdê mı esti bi, teber ra çımanê mı de Mamekiye zaf rındek asayêne, xora heniyo. Hama hetê zon u kulturi ra heni niyo. 

Mı mekteb newe qezenc kerdı bı, xora mı zonê ma ra hes kerdêne. Hende ke mı hes kerdêne, her kemere sero zonê ma ra jü çi nuştêne. Plan u projey ma esti bi, ma senê zonê xo’yo delali raver benime, enê sero ma mışewre kerd.  Ma kêyê jü bırayê xo’yê delali de ameyme pêser. Ma serba zonê xo senê (/çıtewr) gure kenime, ma sero fıkıriyayme.  

Ma tayê plan-projey xo eşti bi werte, ma pêro şagırdi (/talebey) bi, coke ra madiyat sero destê ma gırêdaye mendêne. Teber ra mı vatêne “Ma kami ra paşti bıwazime, o paşti dano ma.” Hama çiyo de henên nêasa, şarê ma teyna medya sosyale sero xo keno baqıl, vano : “Ez zonê xo ra hes kenu.” nuseno de nuseno hama ma çiyê do henên mı nêdi.   

Xora miyanê suke de zi kes zonê ma qesey nêkeno, şarê Dêsımi zonê ma qesey nêkeno, mı va: “Şarê Dêsımi” qusırê mı de nia medên ya, Mamekiye de Mamekiye ra çend teney estê, nêzanu. Ez vanu ke nême ra zêdêri Diyarbekır ra amey, çıra amey şıma mı ra rınd zanenê. Ez fekê xo bestenu, eke mı nêbest, sarey mı kewno bela. Ez bela ra nêtersenu, ez züran ra tersenu. 

Namey gruba ma meyman bi, fıkrê ma politik ra düri, züran ra düri, çıtewr ma zon aver berime ma inan sero vınderdêne. Jü be jü ma qeleme kerde xo dest, çiyê ke zonê ma beno raver, ma nuşti. 

ÇIRA XO RA VANİME MEYMAN?  

Zon u kulturê ma vındi biyayene dero, ma gani wayir vecime. Coke ra dewe be dewe,  kêye be kêye ma benime meymanê şarê xo, ucayan de çı qısey (/qali) beno, senên qısey beno, ma wazenime ke qeyd bıkerime. Kulturê ma senên (/çıtewr)  bi, şarê ma verênde se kerdêne, inan sero ma qeydan gênime u pê namey “Meyman”i ma meştanê şarê xo rê ca verdanime. Fêl u amacê ma niyê:  

1. Ma heme (/pêro) varyantanê çekuyanê zonê ma sero gureyenime. Zonê ma koti de senên qısey beno, qısey senên yenê zon, ca be ca ma qeyd kenime u resnenime meştan.  

2. Çekuyê ke ma qeyd kerdi, ma inan kenime zerrey komputeri, qeyd kenime. Videoyan zi arşivê Gruba Meymani de qeyd kenime.  

3. Gağan u roşananê ma’ê binan sero vındenime, sero şênatiye vırazenime  

4. Zonê Zazaki sero semineran vırazenime, nê semineran de; 

• zonşınasan  
• hunermendan (/senatkaran)  
• şairan 
• nuştoğan 

anime pêser, konferansan vırazenime. 

5. Seba domanan filman vırazenime.  

6. Jü fanzin vecenime: 

• Namey fanzini “Meyman” nanime pıra.  

7. No fanzin de ma ca danime gêncan u şagırdanê Qısımê Zon u Edebiyatê Zazaki. 

8. Be namey “e-qısebend” ya zi “e-çekuye” ra yew aplikasyonê têlefoni vırazenime.  

9. Wextê dersanê weçinıteyan de ma ca be ca geyrenime, seba ke domanê şarê ma dersa zonê xo weçinê, ma wazenime ke şarê xo ikna bıkerime.