Nusret Karul

KERREY MERDIMİ 

featured

Cor de ziyara Tujıki u bınê dewe de zi jû deşte esta, a deşte wesari cılanê keweyan pıra gêna. Wesari ra pey her ca beno wışk. Cêr de awa Ticlay şona. Ena awe xo rê ca zaf kerdo xori, isani hanzar serre bıdevraynê, nêzanayêne hına yew zığır bıvırazo. Hende ke rınd bi, xortan gay u dawar berdêne nezdiyê ucay. 

Dı embazi esti bi, yewbinan ra hes kerdêne. Namey laceki Sey Ehmed bı, o bin zi Aşık bı. Tım u tım piya gayê xo berdêne yaban. Biyê pil, Sey Ehmedi zerr vıste jû keyneke. Zaf hes kerdêne keyneke ra. Kamca ke bışiyêne, dıme ra şiyêne ya zi firıke cenayêne. Keyneke ke kamca de bıbiyêne, gayê xo gırewtêne berdêne Sey Ehmedi het. Uca de gayê xo çereynayêne u peyser ardêne keye. Namey a keyneke zi Xece biye.

Aşıki zi zerr vısti bi Xece. Ey se kerdêne nêkerdêne, keyneke rı nêdayêne ey. Jû roce keynek u waştey xo Sey Ehmedi piya gay berdi bi Gomey Bali. Aşıki zi dıme ra gayê xo gırewti berdi.

Sey Ehmed u keynek şi bi serê yew kerrey de ronışti bi. Xo rê verniya xo sero qal u qısey kerdêne. Uca de dı kelan dayêne pêro, kelo qıckek ciyat bı, da kelê pili ro, kelo pil kewt war, rıyê Xece uca de bı nemrek.

Sey Ehmedi pers kerd:

– Erê Xece, tı çı huwena, tı pey mı kay kena?

Xece vat:

– Nê, nê. O kelo qıckek sey to ciyato, kelo pil zi sey embazê to çiyê rê nêbeno.

Aşık ame nezdi.

Sey Ehmedi vat:

– Bıra Aşık, bê ma het.

Aşık şı verê inan, ronışt. Piya verê roy u gorware seyr kerdêne. Şiyê serê yew kerrey (/kemeri). Aşıki zerrey xo de vat: 

“Ez enê bıkışi, eke merd, keyneke mı rê manena.”

Gırewt Sey Ehmed nusk da uca ra, eşt war. Waxto ke şı war, çımê keyneke biy tari, yew saniya nêvınderde, keyneke zi xo eşt war. Aşıki zi xo eşt destê Xece, o zi kewt war, kewt mabeynê inan. 

Serri ser ra şiy, herunda keyneke de zi herunda laceki de zi ju dara wersi veciyaye, herunda Aşıki de zi teli veciya. 

Eşqê inan gani mend, çırray (/qet) wuşk nêbı, hama tım u tım yew teli miyan inan de mendo inan decneno.

A roce ra pey namey enê kerrey biyo “Kerrey Merdımi.”

Not: Gorware: Pirani de verê royê ticla de dewa kelkomi de namey yew cayo. 

Gomey Bali: Miyarun de verê royê ticla de dewa mehyuni de namey yew cayo.

IMG_8909
KERREY MERDIMİ 

E-posta adresiniz yayınlanmayacak. Gerekli alanlar * ile işaretlenmişlerdir

Giriş Yap

Munzur Press ayrıcalıklarından yararlanmak için hemen giriş yapın veya hesap oluşturun, üstelik tamamen ücretsiz!