Nusret Karul

KHAL U VEYVEKE 

featured

Her qewmi miyan de yew roşan esto. Zaf qewman roşanê xo resnay ewro. Her serre bımbarek kenê.

Eyê şarê ma zi roşanê ma esti bi. Şarê ma kerd bındest, şarê ma sey zonê xo roşanê xo zi vındi kerd.

Dewa ma Mehyun de roşanê dê ma senên bi, senên vındi bi, şi, ez ewro şıma rê vanan.

Hesabê ma ra yewê aşma çeley de (miladi 14 çele) nezdiyê yew hewtey khal u veyveke bımbarek kerdêne. Hesabê ma’yo verên ra hirısê aşma zımıstania peyêne de tince ke şiye peyê koy, roca bine sıfte kerdêne. O waxt gêncê ma ameyêne pêser, yew tene şiyêne, cılê yew khali gırewtêne pıra, jû erdişa sıpêye xo rê vıraştêne, çaput kerdêne paşta xo u sarey xo rê yew çaput piştêne, tam mendêne ro khal u piri. Yewna tene zi şiyêne fistana maya xo gırewtêne pıra, çaput kerdêne pistanê xo, çıçık vıraştêne, yew mexmel piştêne sarey xo ro u rıyê xo nımıtêne. Embazanê binan zi şiyêne miyanê wele ra ğızal vetêne u sawıtêne rıyê xo ra, xo kerdêne siya. 
Keye ra veciyayêne teber, khali sewlê piyê xo, veyveke eyê maya xo, Erebi zi eyê yew khali pay kerdêne u kewtêne miyanê dewe.

Keye be keye geyrayêne, tewre destê Erebi de bi, yew çogane zi destê khali de biye. 
Wexto ke şiyêne kêberi ver, dayêne ber ro.

Şarê keyey kêber akerdêne u kali vatêne:

–    Dam u dam!

Şarê keyey: 

–    Piyê to kam?

Khal:

–    Piyê mı xıncıra xam
Şarê keyey: 

–    Maya to kam?

Khal:
–    Maya mı pantila vaşi 
Mı gırewt eşta kıştay kaşi

Waxto ke unia  vatêne, şarê kêyey şiyêne zerre, çı ke inan dest de esti bi, ardêne dayêne inan u xatır waştêne şiyêne. Waxto ke dewe de pêro kêyey qedênay, gêncê dewa ma pêro ameyêne pêser, yew raşte de zonê ma Zazaki ra deyıri vatêne u govende kerdêne. 

Jû deyıre (/kılame ) zonê ma ra: 

El Şemi malê xo roto wi dayê wi dayê 
Dawo yew çapli gırewto, maya to bımıro hüznayê
Dıma gırewt ko kewto, wi dayê wi dayê 
Vengê xo ko de veto, maya to bımıro hüznayê 

Waxto ke govende kerdêne, yew teney veyveke remnayêne, gırewtêne berdêne. Khal dormarey xo ewniyeno (/niya dano), veyveke nêvêneno u çogana xo gêno, dıma kewno. Wexto ke resa veyveke het, o merdumo ke veyveke remnay bi, çogana xo werdêne. Khali destê veyveka xo gırewtêne u ameyêne govend kerdêne. Peyniye de Erebi tewrey xo akerdêne, kami de ke çı esti bi, eştêne zerrey tewrey u khali zi ay domanê ke uca de biy, destê xo eştêne zerrey tewrey, çı ke ameyêne dest, dayêne domanan (/phıtan). 

İnan kelmelê xo gırewtêne, şiyêne kêyey yew feqıri, uca de werdê xo pewtêne esid u zerveta xo vıraştêne u werdêne. Verê soba de çaya xo werdêne u wayıra kêyey inan rê zonê ma ra estanıki vatêne. 

Peyniye de enê kelmelê ke pêser kerdi bi, uca de wayırê kêyey rê ca verdayêne u raşiyenê yew be yew şiyêne keyanê xo.

Nıka her çi xo vir ra beno şono, key ke bi vındi, o waxt ma rê beno şirın. Key ke weşeye şiye, weşeye yena ma viri. Key ke domaneye şiye, domaneye yena ma viri. Key ke isan ena dınya ra şi, o waxt yeno ma viri, ma danime serey xo ro hama çiyo ke vındi biyo, peyser nêno.

KHAL U VEYVEKE 

E-posta adresiniz yayınlanmayacak. Gerekli alanlar * ile işaretlenmişlerdir

Giriş Yap

Munzur Press ayrıcalıklarından yararlanmak için hemen giriş yapın veya hesap oluşturun, üstelik tamamen ücretsiz!